Kuryente sa Bantayan di paumentohan

CEBU, Philippines - Dili na angayan nga mabalaka ang mga konsumedor sa elektrisidad sa isla sa Bantayan bahin

sa giduso nga P2.65

matag kilowatt hour nga usbaw sa ilang bayranan kay dili kini ipatuman.

      Kini human ipasalig sa presidente sa National Power Corporation (Napocor) atol sa ilang tigum ni Governor Gwen Garcia, diin kauban  sila  si  4th district representative Benhur Salimbangon, mga mayor sa tulo ka lungsod sa Isla sa Bantayan ug uban  pang mga  kadagkoan sa power utilities sa nahisgutang Isla.

Si Kongresista Salimbangon mibutyag  sa taga  media nga nasiguro  niya  nga dili mosaka  ang  presyo  sa kuryente  sa maong lugar  tungod  kay  may pasalig  na  nga gibuhian  ang taga  Napocor.

Iyang  gipasabot  nga  bisan  siya  mismo, maluoy  nga magsud-ong  kun  magbaguod  ang  mga molupyo  sa  maong  lugar  sa kabug-at  sa pas-anonon  niining bayranan  sa kuryente  busa  misalig  siya  sa Napocor  nga tumanon  niini  ang  ilang  gisaad.

Samtang ang presidente  sa Napocor  nga si Froilan Tampinco milaom  nga  masabtan sa Energy Regulatory Commission ang ilang baruganan kay  alang  kini  sa kaayohan  sa mga molupyo  sa isla  sa  Bantayan.   - BANAT NEWS