Gibunala'g armas ulo hapit mabuak

CEBU, Philippines - Hapit mabuak ang bagul-bagol sa usa ka lalake nga gibunalan sa pul-an sa armas de fuego sa tulisan nga mihimulbol kaniya ug sa iyang tulo ka kauban didto sa sitio Tunay Looc, barangay Poblacion, sa lungsod sa Liloan sa miaging kaadlawon.

Ang naangol mao si Allen James Mag-asin,18, ulitawo, taga Yati, Liloan, samtang ang mga kauban niya nga sila Rojaine Charm Calonia, 21, taga Yati, Liloan usab, Denyl Sugarol, 25, ulitawo ug Lesly Ann Cogal, 20, dalaga, nga pulos taga Nangka Consolacion wala hilabti sa mga tulisan apan gihimulbolan sa ilang mga butang.

Samtang ang mitulis kanila tulo ka tawo nga wala hiilhi kinsa nagsakay og usa ka   motorsiklo        

Si PO2 Neil Vincent Guingona sa Liloan Police Station mibutyag sa Banat News nga sa alas 2:15 sa kaadlawon nag-inom og bino sa daplin sa karsada ang mga biktima dihang kalit lang mihunong sa atbang ang usa ka motorsiklo nga gisakyan sa tulo ka wala hiilhing lalaki.

Sa pagkanaog nila sa sakyanan miduol kini ngadto sa mga biktima dayong lanit sa ilang armas de fuego ug kutsilyo ug gition ngadto sa mga biktima uban sa pagdeklarar nga tulis.

Gumikan sa kakalit, walay nahimo ang mga biktima gawas sa paghatag sa ilang mga kuwarta , alahas, cell phone ug uban pa. Apan sa dayon nang sibat sa mga tulisan mihiwasa sa kasuko si Mag-asin kay buot mosukol sa maong mga kriminal.

Dihadiha ,ang usa nga nagbitbit sa iyang pusil nga wala hisayri ang kalibre, maoy mipuspos sa pul-an niini ngadto sa bagulbagol  sa biktima ug giundangan kini dihang mihutlay na ang naulahi kansang lawas   nabulit na sa daghang dugo. 

Gibiyaan sa mga tulisan si Mag-asin nga nalup-og sa karsada ug gihatud dayon kini sa iyang mga kauban ngadto sa tambalanan.

Samtang dali kaayong misakay ang mga tulisan sa ilang motorsiklo dayon sirit pahilayo sa maong lugar.

Ang mga tigpaniid nga nasayod sa maong hitabo nakaingon nga mirisi ug maoy pago sa mga tawong bisan tunga nang gabii magpunay og laroy sa karsada. (/WC)   - BANAT NEWS