Malinawon ang pagbukas sa klase

CEBU, Philippines - Hapsay ug malinawon ang unang adlaw sa pagbukas sa klase kagahapong adlawa dinhi sa dakbayan ug probinsya sa Sugbu.

Ang mga tunghaan gibisita sa mga kadagkuan sa Police Regional Office-7 aron pagsuta sa sitwasyon sa mga ginikanan ug tinun-an nga ni-eskuwela sa unang pagbukas sa klase.

Gani si Sr. Supt. Melvin Ramon Buenafe, hepe sa Cebu City Police Office (CCPO) mibisita sa mga pampublikong tunghaan ug usa sa iyang gibisita kagahapon mao ang Guadalupe Elementary School. Ang maong tunghaan maoy pinakadaghang tinun-an karung tuiga kun itandi sa ubang pampublikong tunghaan dinhi sa dakbayan sa Sugbu.

Matud ni Buenafe nga alas-6:30 kagahapon sa buntag gi-deploy ang kapin usa ka gatos ka personnel sa mga tunghaan ug niabag kanila ang mga cross multipliers pagbantay sa mga batang nieskuyla kagahapong adlawa.

“Kun molabang sila, mo-assist atong kapulisan, i-remind sila sa tamang lugar sa pedestrian,” sumala pa ni Buenafe kinsa miawhag usab sa mga ginikanan nga di isalig sa uban ang seguridad sa ilang mga anak. Apan giklaro ni Buenafe nga human sa usa ka semana ibalik na sa naandang trabaho ang mga polis.

Si Buenafe kagahapon nanghatag og mga leaflets sa mga ginikanan nga dunay mga pahimangno sa kadalanan.

Si Chief Insp. Enrique Belciña, hepe sa Guadalupe Police station nagkanayon ang Guadalupe Elementary School dunay gibana-banang moabot ngadto sa 7 mil karong tuiga itandi sa miaging tuig nga miabot lamang og 6,400. Nagsunod sa Guadalupe Elementary School nga pinakadaghan og tinun-an mao ang City Central dul-an 6 mil, Lahug Elementary School kapin 5 mil ug gisundan kini sa Tejero Elementary school nga kapin sa 3 mil ka mga tinun-an.  - BANAT NEWS