1 patay 1 angol sa pagpamusil

CEBU, Philippines - Namatay ang usa ka ulitawo samtang angol usab ang usa ka menor de edad sa pagpamusil sulod sa diskohan sa barangay Estaka, lungsod sa Compostela kagahapon sa alas 4:00 sa kaadlawon.

Ang nakalas mao si Reynaldo Paras, 22, ulitawo, samtang ang naangol mao si Christopher Batalona Basay, 12, nga pulos nagpuyo sa maong dapit.

Sa pakighinabi sa Banat News ni PO2 Fidelito Jopia sa Compostela Police Station nasayran nga ang biktima nanisko sa maong higayon atol sa kasaulogan sa pista sa maong lugar.

Apan samtang nalingaw kini og sayaw kalit lang mitumaw ang usa ka wala hiilhing tawo kinsa mition sa iyang tingkoy og armas de fuego nga wala hisayring kalibre ug sa pagbuto niini milapos ang bala sa iyang agtang.

Sa dakong dimalas ang maong bala gikan sa ulo ni Paras wala makatugpa sa yuta kay mitaroy kini sa paa ni Basay kinsa nagsayaw usab sa maong higayon.

Gumikan sa maong kahadlok, mikabad og dagan ang mga tawo samtang misirit usab pahilayo sa maong lugar    ang kriminal.

Si PO2 Arnie Goc-Ong usa usab ka polis sa Compostela nagkanayon nga si Paras nagpuyo lamang sa balay sa iyang silingan tungod kay wala na kini tagtungod ug base sa iyang pasiunang imbestigasyon iyang nasayran nga si Paras giingong membro   sa usa ka fraternity group nga wala usab ibutyag ang ngalan.

Si Paras ug Basay daling gidala sa mga residente ngadto sa Liloan Health Center apan gibalhin kini ngadto sa Vicente Sotto Memorial Medical Center diin kini ideklarar nga patay na sa pag-abot didto.

Hinuon si Basay naatiman dayon sa mga doktor sa VSMMC ug natambalan dayon ang samad niini sa paa.

Ang kapolisan nagpadayon pa sa pagpangita sa kriminal samtang gisuta pa nila ang   tinuoray nga motibo sa maong pagpamusil. (WC)(BANAT NEWS)