School buses inspeksyunon

CEBU, Philippines - Gipakigkitaan ni Land Transportation Office Regional Director Raul Aguilos ang nagkadaiyang school heads sa dakbayan aron ipahibalo kanila nga adunay pagahimoong inspeksyon sa ilang mga school buses. Sa pakighinabi sa Banat News ni Aguilos mibutyag kini nga buot nilang masusi kun misunod ba ang mga tunghaan sa direktiba sa Land Transportation and Franchising Regulatory Board (LTFRB) kalabot sa pagdumala sa ilang mga school buses.

Nag-unang tan-awon sa mga inspectors ang kaluwasan sa mga tinun-an pagsakay sa maong mga bus ug kwalipikasyon sa mga drayber ingon man ang saktong pagmentinar niini subay sa ilang prangkisa. Butyag pa ni Aguilos nga karung unang semana sa Hunyo himuon ang inspeksyon.

Gawas sa mga tunghaan, padayun usab nga mohimo og random drug testing ang LTO aron masuta kun si kinsa pa kadtong mga pampublikong drayber nga tiggamitan gihapon og ginadiling drugas. Samtang giawhag ni Aguilos ang mga tinun-an sa pagsumbong gilayon sa mga badlongong drayber nga wala motuman sa 20 porsiyentong diskwento isip student privileged. Dugang pa ni Aguilos nga mamahimong moadto sa iyang buhatan ang mga tinun-ang adunay reklamo batok sa drayber o mamahimo usab silang mo-post lang sa Facebook page sa LTO. (BANATNEWS)