Mga drayber mahimong ireklamo

CEBU, Philippines - Ang Land Transportation Franchising and Regulatory Board (LTO) 7 miawhag sa mga pasahero sa Public Utility Jeepneys (PUJ) sa pagsang-at og reklamo batok sa mga drayber nga padayong mokolekta og pletihan nga lapas sa gimandong minimum fare.

Matud pa ni LTFRB Regional Director Ahmed Cuizon nga ang matag usa mamahimong mosang-at og reklamo apan ang reklamante kinahanglang andam nga mopakita ug moatubang sa maong drayber atol sa eskedyul nga adjudication.

 Dugang pa ni Cuizon nga ang labing maayo nga butang kung ang mga pasahero mangusog sa iyang kaugalingon sa pagsakto sa mga salawayong drayber mao nga sa madali makat-on ang mga drayber sa kamatuoran nga ang mga pasahero kamaong mopatigbabaw ug mobarog sa ilang katungod.

Nagtuo si Cuizon nga pinaagi niini magpanuko og binuang mga drayber ilabi na kung duna nay masampolan.

Ang silot sa drayber nga magmagahi pagsunod sa minimum fare nga sa pagkakaron gipaubos nalang sa P7.50 tungod sa pagbarato sa petrolyo mamahimong pamultahon og P1,500.

Dayag kaayong ang mga drayber kun bayran og P10 suklian ra nila og P2 ang pasahero, kung hatagan og P8 dili nila suklian og P.50 ang pasahero, apan kung P20 unya duha ang pasahero mosukli sila og P5.

Ang nakapait aduna pay mga drayber nga mosinghag sa pasahero kun bayran lang sila og P7.50. Nasuta usab sa Banat Manobela nga sagad sa mga drayber dili na gani moila og estudyante o senior citizen ang pasahero.Pipila ka mga sumasakay nga gikahinabi sa Banat Manobela ang wala makauyon sa awhag sa LTFRB nga pagsang-at og personal nga reklamo batok sa drayber tungod sa kahasol niini.

Matud pa nila gamay ra kaayo ang P.50 aron sila maglanganlangan sa ilang pag-adto aron mosang-at pa og reklamo ngadto sa buhatan sa LTFRB.

Mas gipaboran nila ang mga sugyot sa mga sumasakay nga mas maayong ang mismong mga sakop sa LTFRB nalang maoy mangunay og paniid sa mga drayber aron sila mismo makakita sa binuang ug aron sila mismo direktang mosikop ug makapatuman og dinaliang aksyon.

Hinuon si Cuizon mipahimangno sa mga pasahero sa kanunay nga pagdala og .25 sentimos aron wala nalay maalkanse.

Niadtong Mayo 15 gimando ang pagbalik sa minimum fare nga P7.50 gikan sa P8 nunot sa pagbarato na sa presyo sa petrolyo apan bisan pa niini wala motuman ang kinabag-ang drayber nga nagpakabuta bungol sa sintimiyento usab sa mga sumasakay sa matag P.50 nga dili iuli sa mga drayber.(/EIM)  (BANATNEWS)