PPI supak sa bill nga magpiit sa press freedom

CEBU, Philippines - Ang Philippine Press Institute, usa ka   “national association of newspapers” nga may    71 ka mga membro sa tibuok nasud , nagpabiling lig-on sa iyang baruganan nga unsa mang balaod nga magpiit sa   freedom of the press kon kagawasan sa prensa alang sa makatarunganon ug responsabli nga pagpanuwat og balita, makalapas kini sa batakang balaod.

Ang PPI mipasabot sa iyang pagsupak sa penalty clause sa “Data Privacy Act” on the Breach of Confidentiality sa Senate Bill No. 2965 “An act protecting individual personal data in information and communications systems in the government and in the private sector, providing penalties in violation thereof and for other purposes."

Kining maong balaodnon nagbaraw   sa mga tigpanuwat og balita nga mahimong responsabli ug matinud-anon sa pagtaho og mga butang nga gibase sa kamatuoran ,   magdili kanila gikan sa pagtuman sa ilang katungdanan ug gimbuhaton isip tigbutyag sa kamatuoran.

Nga sa panahon nga molapas sila ning balaora, silotan sila sa   pagkabilanggo ug pamultahon nga bug-at ra   kaayo alang sa usa ka reporter, tigsulat og balita presidente, manager ug editor-in-chief, organisasyon sa pamalita.

Dili kini makiangayon tungod kay usa kini ka pagpig-ot sa institusyon sa pamalita kansang mandato mao ang paghungit sa publiko og tinuod nga kasayoran base sa tinuod nga mga detalye.

Ang Section 30 of Senate Bill No. 2965 kalabot sa Breach of Confidentiality nagpahigayon nga ang silot nga pagka-bilanggo gikan sa duha ka tuig ug upat ka buwan ngadto sa lima ka tuig ug multa nga di momenus sa P500 mil apan di molapas sa P2 milyones , maoy ipatuman sa higayong ipublikar sa tigbalita ug sa pamantalaan ang tinagoang kasayoran nga buot ililong ngadto sa   publiko.

Ang maong kaso panubagan sa responsabling reporter , writer, president, publisher, manager ug editor-in-chief   ubos ning maong balaod.

Sa iyang   mga suwat ngadto kang Senador Edgardo Angara ug mga representante nga sila si Roman Romulo ug Sigrido Tinga, si PPI executive director Ariel Sebellino subling mipasabot nga ang gipahigpitang provision sa maong balaodnon kinahanglang mapapas.

Matud niya nga ang maong balaodnon dako kaayo og ikadaot sa mga tigbalita ug tataw kaayo nga usa kini ka pangatake batok sa kagawasan  sa prensa ug gustong mopiit sa mga tigbalita gikan sa pagka-responsabli ug makatarunganong pagbalita , matud ni Sebellino.

Gitakda nga lig-onon ang maong balaodnon atol o sa dili pa ang Hunyo 6. (BANATNEWS)