CEBU, Philippines - Ang Police Regional Office (PRO) 7 nag-andam og crime prevention tips alang sa mga estudyante nga dili taga syudad sa Sugbo aron giyahan sila paglikay sa unsa mang insidente sa kadalanan.
Matud pa ni P/Supt. Audie Villacin sa Regional Investigative and Detective Management Division (RIDMD) sa PRO 7 nga ang maong crime tips ila pang gihan-ay karon aron ipa-imprinta ipakatap dungan sa pagbukas sa klase ugma, Lunes.
Hinuon miingon si Villacin nga kining ilang ipakatap karong semanaha dugang nalang kini sa gipakatap na nilang daan sa miagi pang mga semana nga ang tanan gitumong alang sa kaluwasan sa mga magtutungha gikan sa mga kamot sa kriminal.
Si Villacin nagkanayon nga ilang imantala ang mga crime tips sa mga dormitoryo sa downtown area sa Sugbo o sa mga dapit nga adunay daghang mga estudyante nga dili taga Sugbo ug igo lang nangabang og balay.
Apan ila usab kining ipakatap sa mga tunghaan ilabi na niadtong mga dapit nga kasagarang mahitaboan sa krimen.
Naglakip sa maong crime tips mao ang pahimangno sa dili paggamit sa ilang cellphone sulod sa jeep de pasaheroan tungod kay dali kaayo kining malabni sa mga snatcher.
Kun ang mga estgudyante mabiktima na sa mga kriminal patawgon dayon sila sa police hotline aron katabangan dayon sila sa kapolisan. (BANATNEWS)