CEBU, Philippines - Upat ka hepe sa kapulisan sa Negros Oriental ang gipalagpot sa ilang pwesto tungod sa kapakyas sa pagsumpo sa ilegal nga sugal sa ilang tagsa-tagsa ka hurisdiksyon.
Sa gipadalang press release sa kadagkuan sa Negros Oriental Provincial Police Office (NOPPO) dinhi sa Banat News nagbutyag nga niadtong Mayo 20, hingpit nga gipatuman ang “One Strike Police” ngadto sa tanang hepe sa kapulisan sa naasoy’ng lalawigan.
Kini aron molihok gyud ang kapulisan pagsumpo ug pagdakop sa mga tawong gidudahang nalambigit sa ilegal nga sugal sama sa “swertres” nga gipadagan sa mga financiers sa maong lalawigan.
Si Sr. Supt. Edward Caranza, ang director sa NOPPO padayong mipahimangnu sa iyang mga unit commanders sa pagsumpo sa ilegal nga sugal sama sa “swertres” sa maong probinsya.
Kini agi og tubag usab sa kamanduan sa kalihim sa Department of Interior and Local Government nga si Jesse Robredo.
Ubos sa “One Under the “One Strike Policy” kadtong mapakyas sa pagtuman sa maong kamanduan palagputon ug relibohan.
Ang giparelibohan mao sila si Police Chief Inspector Domenciano Distrito sa Tanjay City Police Station, Police Inspector Deogracias Lorico sa Valencia Police Station ug Police Inspector Romulos Delfin sa Dauin Police Station.
Samtang si, Police Inspector Rolando Asidoy sa Santa Catalina Police Station girelibohan gumikan sa nahimo niining kalapasan sa iyang trabaho human napakyas sa pagpasaka og kasong kalapasan sa R.A. 9165 sa Dangerous Drugs Act of 2002 ug R.A. 9287 or illegal numbers game ug karun nag-atubang og kasong administratiba. (BANAT NEWS)