Biniyaang pinirito nakaingon sa sunog

CEBU, Philippines - Mokabat sa P70 mil ang danyos sa sunog nga miigo sa sitio Grass Avenue luyo sa Holy Cross Parish Church sa barangay Basak-Pardo sa miaging gabii.

Biniyaan nga pinirito ang giingong nakaingon sa sunog diin nadawat ang alarma sa kabomberohan alas-6:18 ug ilang nakontrolar sulod lang sa upat ka minutos nga mirsulta sa pagkaangol sa pito ka balay ug usa ang partially damage lang.

Matud ni FO3 Lowel Opolintisima, imbestigador sa kabombirohan ang panimay ni Samuel Fernandez nga gihimong boarding house ug gipuy-an ni Delia Rodriguez ang gigikanan sa kalayo.

Matud ni Opolintisima nga nagluto si Rodriguez apan iya kining gibiyaan hinungdan sa sunog.

Duha ka residente sa dapit ang gitabang sa mga sakop sa rescue team nga miresponde sa maong alarma mao sila si Meldrid Batican nga giatake sa iyang sakit nga hubak tungod sa maong sunog ug Rosalinda Beniba nga nasamad sa wala niyang kamot.

Si Cebu City Fire Marshall Sr. Supt. Aderson Comar nga nahinabi sa Banat News mibutyag nga giisa sa task force alpha ang alarma aron makatabang ang duol nga mga fire stations susama sa        Talisay.

Matud pa ni Comar nga tungod sa kagrabe sa trapiko maong nagpatabang siya sa kasikbit nga kabomberohan. (BANAT NEWS)