Minor nanulis aron may pamlete

CEBU, Philippines - Usa ka menor de edad nga na-stranded dinhi sa Sugbu ang milampos sa pagtulis sa usa ka drayber sa taksi nga iyahang gidunggab apan gidemalas kay nadakpan kini alas-8 pasado sa buntag kagahapon diha sa Ramos Public Market sa barangay Cogon Ramos siyudad sa Sugbu.

Ang biktima giilang si Sergio Caritan,43, nagmaneho sa K-Factor Taxi kinsa nasamdan sa liog ug suwang atol nga nakiglayog sa tulisang armado og kutsilyo.

Ang walay swerteng tulisan nadakpan sa mga sakop sa Special Weapons and Tactics (SWAT) diha na dapit sa may Sacred Heart dalan D. Jakosalem sa barangay Sta. Cruz nga lumad nga taga Bohol apan kasamtangan nagpuyo diha sa barangay Pusok, Lapulapu City.

Si Caritan nga nahinabi sa mga tigbalita mitug-an nga misakay kaniya ang suspek sa dakbayan sa Lapulapu ug nagpahatud sa Cogon Ramos pag-abot sa maong dapit mipatak na og P240 ang metrohan niini.

Apan inay mobayad, mibunot na hinuon og kutsilyo ang suspek ug gition sa iyang liog hinungdan nga misukol ug nakiglayog ang biktima.

Nadala sa suspek ang kapin usa ka libo ka pesos nga iyang kinitaan ug misibat palayo sa lugar apan nadakpan kini dayon, apan ang nabawing kwarta P790 nalang ug ang kutsilyo.

Si Maghinay nga nahinabi sa mga tigbalita mitug-an nga una kining higayon nga nanulis siya kay buot lang niyang makauli na sa ilaha sa Bohol human siya namista sa Lapulapu apan nahutdan na siya og kwartang ipamlete maong nanulis siya. (BANAT NEWS)