Gold medalist sa Palaro gipahalipayan

CEBU, Philippines - Mikabat sa P90 mil ang gihatag ni Gov. Gwendolyn Garcia isip pahalipay   sa mga atleta sa Catmon Elementary School Volleyball Girls Team ug sa Tuburan National High School Lawn Tennis Boys Team   kinsa nahimong kampiyon sa dili pa dugay nga    Palarong Pambansa didto sa lalawigan sa Pangasinan.

Ang paghatag sa maong pahalipay gihimo atol sa awarding ceremony didto sa conference room sa Kapitolyo   nga gitambongan sa mga kadagkuan sa lungsod sa Catmon sa pagpanguna ni Vice Mayor Irish Gestopa ug mga konsehal niini ug sa kadagkuan sa lungsod sa Tuburan nga gipangulohan ni Mayor Aljun Diamante ug sa iya usab nga mga konsehal.

Sa maong kalihukan gipadangat usab nila ni 3rd district Board Member Alex Binghay, ug 2nd District Board member Willy Cameniro ang ilang kahinangop ug pahalipay sa maong mga atleta nga   na-champion sa volleyball ug lawn tennis.

Kaubang mipahalipay sa maong mga kampiyon mao si Provincial School’s Division Superintendent Dr. Arden Monisit kinsa misaad nga sa sunod nga Palarong Pambansa dublehon pa nila ang ilang paningkamot aron makakuha pa og dugang   bulawang medalya ang mga estudyante sa lalawigan sa Sugbo sama sa ilang nadawat karon.

Mapasigarbuhon usab kaayo si Gobernador Garcia sa maong mga atleta nga Sugboanon sa nahimong   gold medalist sa 2012 Palarong Pambansa.

Gidawat nila ni Jude Tabo-Tabo ug Alexis Ondoy, lawn tennis Boys Team, sa Tuburan Natl. High School ang tag P15 mil matag usa kanila nga ganti samtang tag-kapin usab nga P6 mil ang nadawat matag usa ang nadawat   sa mga atleta sa Catmon Elementary School, Volleyball Girls , kinsa mapasalamaton usab kaayo ngadto sa gobernador. (BANAT NEWS)