Lending firm gitulis magtiayon misukol

CEBU, Philippines - Usa ka nag-inusarang tulisan ang pugsanong miilog sa sakyanan nga dunay kwarta ug armas sa magtiayong negosyante diha sulod sa ilang buhatan kagahapon sa hapon sa barangay Laray 1 Poblacion sa syudad sa Toledo.

Ang mga biktima mao sila si Alfredo Yap, 68, ug Lydia Yap, 64, taga Pandacan, Pinamungahan, nanag-iya og usa ka lending firm diha sa nahitaboan.

Sa pakighinabi sa Banat News ni SPO4 Carmelito Hernanes mibutyag nga nagduda silang tulis gyud ang motibo sa tulisan nga armado og pistola aron tulison ang maong establisamento apan misukol ang magtiayon nga nakiglayog niini hinungdan nga naratol kini ug miikyas.

Ang tulisan midala hinuon sa Isuzu Highlander SUV sa magtiayon aron makaipsot, nasuta dunay P15mil nga cash ug armas sa biktima nga kalibre .45 nga armas sa mga Yap.

Ang mga polis nga daling mihimo og roadblock ug migukod sa tulisan napakyas sa pagsikop niini apan narekober ang sakyanan sa mga Yap nga gibangga sa railings sa dalan sa barangay Lutopan.

Matud pa ni Hernanes wala na marekober ang kwarta ug ang armas sa magtiayon diha sa sakyanan. Ang lalaking Yap nga nakaangkon og samad sa ulo tungod sa linayugay gidala sa Toledo District Hospital. (BANAT NEWS)