Height sa magpolis magpabilin

CEBU, Philippines - Bisan kun kaaprobahan ang balaodnon sa kongreso nga magwagtang sa height requirement sa aplikante sa pagka-polis, magpadayon gihapong ipatuman sa kapolisan ang standard nga gitas-on sa mag-polis nga lalaki ug babaye, matud pa ni Cihef Insp. Artemio B. Ricabo sa Police Regional Office (PRO)7 kagahapon.

Ang maong pamahayag ni Ricabo may labot sa gisang-at nga balaodnon ni Kongresista Pablo John Garcia sa ikatulong distrito sa lalawigan sa Sugbo bahin sa tumong niining pagwagtang sa height requirement kon gikinahanglang   gitas-on sa mga mo-apply pagkapolis.

Sa pagkakaron gihimong pamaagi sa polis nga ang kwalipikado lamang nga madawat sa pagkapolis mao ang lalaki nga may 5’4” ang gitas-on , samtang 5’2’’ usab ang babaye.

Apan matud pa ni Ricabo nga kun mosaler ang balaodnon ni Congressman PJ, modawat gihapon sila og aplikante nga wala makaabot sa kasamtang ang gipangayo nga tukmang gitas-on sa mag-polis, apan ibutang kini sa ikaduhang prayoridad, ug ang anaa sa tukmang gitas-on maoy hatagan og unang prayoridad, matud pa niya.

Usa sa mga katarungan nga gipadayag ni Ricabo mao nga kun kuwang sa gitas-on ang usa ka polis dali ra kini makapusil patay sa iyang gukdon nga kriminal kay lupigon kini sa linayogay ug binugnoay ilabi na kun taas ug dakong tawo kay kaniya ang iyang kontra.

Apan   kun husto og sukod ug pamarug ang usa ka polis, ug ang kontra niini mubo ug mas gamay pa kat kaniya, sayon ra niya kining lubagon pinaagi sa kinamot ug di kinahanglan pang mogamit sa iyang armas aron sa pagpatay niini, sumala pa ni Ricabo.

Busa alang kang Ricabo nga bisan kun ibalaod ang   pagwagtang sa height requirement sa mag-polis magpabiling ipatuman sa kapoplisan ang paghatag og first priority sa aplikante nga husto og height. (BANAT NEWS)