Rama mopakatap og 100 ka panday

CEBU, Philippines - Mokabat sa 100 ka panday ang ipakatap karong adlawa sa City School Board nga gipangulohan ni Mayor Michael Rama ngadto sa nagkadaiyang pampublikong tunghaan aron ayuhon ang mga nagkadaiyang depekto sa mga edipisyo sa eskuwelahan nga mogamit sa materyales nga hinatag sa pribadong   mga kontraktor ning dakbayan.

Mangunay usab si Rama og suroy karong adlawa sa nagkadaiyang eskuwelahan aron sutaon ang kahimtang niini.

Usa usab sa ipabuhat ni Rama mao ang pag-panglimpiyo sa mga kanal aron pagsiguro nga hinlo ang tanang tunghaan inigsugod sa klase sa sunod semana.

Ang mayor nakigtagbo sa mga kontraktor ug supplier sa mga eskuwelahan sa ipatuman niyang “Adopt A School Program”.

Sumala pa ni Rama nga sukad sa iyang pagka-konsehal kaniadto, matag tuig naandan na niyang gihimo ang pagbisita sa mga tunghaan ilabi na kun magpaingon na sa pagbukas sa klase aron masuta kung unsay mga kuwang niini.

Gipaalerto na usab sa mayor ang kapolisan ingon man ang mga security personnel sa matag eskuwelahan aron malinawon ang pagbukas sa klase.

Ang Cebu City Traffic Operations Management (CITOM) gitahasan na usab sa mayor sa higpit nga pagbantay sa mga kadalanan sa pagsiguro nga hapsay ang dagan sa trapiko   sa pagbukas sa klase. (BANAT NEWS)