Senator-judges naka "pogi points"

CEBU, Philippines - Nagtuo ang usa ka election analyst nga ang mga senator-judges nga mibotar pagkombikto kang Supreme Court Chief Justice Renato Corona kagahapon makahakot og daghang boto karong 2013 elections.

Si Mon Casiple, ang executive director sa Institute for Political and Electoral Reform (IPER), nagkanayon nga nakakuha og ‘pogi points’ sa mga botante ang mga senador nga pabor sa pagpalagpot kang Corona, pinaagi niini dugang unya unom ka tuig silang makalingkod isip senador, sumala pa niini sa report sa GMA News.tv.

Ang maong makasaysayanong impeachment trial daan nang gipaabot sa publiko nga kombiktohon gyud si Corona ug lisod na alang sa mga senator-judges nga i-acquit si Corona.

Matud pa ni Casiple mas sayon iesplikar kung kombiktohon si Corona nungka sa pag-acquit kaniya.

“Conviction kasi ‘yan ‘yung perception ng karamihan… na ang pangyayari sa impeachment is for conviction so ang expectation is conviction and not acquittal. Kaya kung bumoto sila for acquittal, mahirap maipaliwanag ‘yun,” dugang pa niini.

Hinuon giklaro niyang posibleng duna pay kausaban unya sa hunahuna sa mga botante kabahin sa mga senator-judges sanglit layo pa ang 2013 ug daghan pang mahitabo.

Lakip sa mga gustong magpa-reelect sa 2013 mao sila si senador Alan Peter Cayetano, Francis Escudero, Gringo Honasan, Loren Legarda, Antonio Trillanes, ug Koko Pimentel. (Gikan sa Wires/EIM)