Drayber gi-ambush patay

CEBU, Philippines - Patay ang usa ka drayber sa traysikol human gipusil samtang namasahero alas-9 pasado sa miaging buntag diha sa sitio Lawis, Alaska sa barangay Mambaling siyudad sa Sugbu.

Si Rolly Loro, 27, kasamtangang nagpuyo sa maong lugar apan lumad nga taga lungsod sa Tabuelan, patay na pag-abot sa Cebu City Medical Center (CCMC) nga nakaangkon og samad pinusilan sa iyang kalawasan.

Nailhan hinuon sa kapulisan ang suspetsado apan padayong gipangita nga si Jesus Villordon, alyas 'Bangas' nagpuyo sa maong lugar.

Sa imbestigasyon nila ni SPO1 Victor Ruel Ayuman, PO3 Lou Pagara ug PO1 Esmer Escultor sa Homicide Section nagbutyag nga nihunong ang biktima sa maong lugar dihang kalit miabot ang suspetsado ug kalit mipusil sa biktima makadaghang higayon ug misibat ang suspek.

Ang mga tawo sa dapit miingon nga midagan pa ang biktima pauli apan nahagba kini ug gitabang sa mga kauban niini sa boarding house pagdala kaniya sa CCMC apan namatay gyud kini.

Gisusi pa karon sa kapolisan ang motibo sa maong krimen. BANAT NEWS