Rotary Club of Cebu molusad og kampanya vs dengue

CEBU, Philippines - Giawhag sa usa ka doktor sa Vicente Sotto Memorial Medical Center ang mga lokal nga kagamhanan sa rehiyon sa pagtabang nga makapalit og kemikal nga epektibong pangontra sa lamok nga nagdala karon og sakit nga dengue.

Si Wyben Briones sa VSMMC ug sakop sa Rotary Club of Cebu nagkanayon nga nagkinahanglan sila og dugang pundo alang sa kemikal nga “Temephos” nga naila nang epektibong pangontra sa mga nguyo-nguyo nga mamahimong lamok.

Gipasabot niya nga ang maong kemikal usa ka agricultural pesticide ug environmental friendly apan mopatay sa mga nguyo-nguyo.

Ang Temephos mao usab kini gigamit sa Estados Unidos sa ilang mga tanaman sa prutas ug uban pang mga nasud tungod kay gamay ra kaayo ang “toxic” nga sagol sa maong kemikal ug dili makaapekto sa tawo.

Matud niya nga aprubado ang maong kemikal sa World Health Organization (WHO) ug sa Department of Health (DOH) nga luwas gamiton.

Si Briones mibutyag nga ang Thailand nga usa usab ka tropical country sama sa Pilipinas nangangkon nga walay kaso sa dengue hangtud karon sukad migamit sa maong kemikal niadto pang 1976.

Sulod sa napulo ka tuig ang rehiyon-7 duna nay 15,000 ka kaso sa dengue, 102 na ang namatay. Ang Sugbo sa tuig 2010 maoy dunay labing taas sa kaso sa dengue.

Ang Rotary Club nakig-alayon karon sa DOH ug mipundok og grupo sa mga volunteers aron ipahigayon ang gitawag nilang “massive larvicide campaign” o ang pagpangita ug pagpatay sa mga nguyonguyo dinhi sa rehiyon.

Matud ni Briones nga niadtong tuig 2010 ubos sa pagtugot sa rehiyonal nga buhatan sa DOH misuway sila sa paggamit sa maong kemikal diin ilang nasuta nga mikunhod ngadto sa 73 porsiyento ang kaso sa dengue sulod sa usa ka tuig. Niadtong Septiyembre 26, 2011 mipahigayon na usab sila og susamang kampanya ug gikan sa 6,000 ka kaso sa dengue mikunhod kini ngadto og 84 porsiyento.

Matud niya usa ka gramo sa kemikal magamit sa usa ka metro kwadrado (1 sqm.) nga breeding site sa lamok.

Niining buwan sa Mayo nabantayan nga dunay 20 ka mga barangay sa Sugbo ang midaghan ang kaso sa dengue ug 700 na ang nasakit.

Ang mga nag-una niini mao ang Guadalupe, 12, Bacayan, 4, Lahug, 4, Inayawan, 2, Labangon, 6, San Nicolas, 4, Mabolo, 3, ug Sambag, 3. BANAT NEWS