CEBU, Philippines - Talandugon ang usa ka shellcraft worker human kini gipusil sa usa ka tanod sa barangay Maribago dakbayan sa Lapulapu sa milabay’ng gabii.
Ang biktima mao si Ronaldo Lumandas, 32, residente sa maong dapit nakaangkon og samad pinusilan sa dughan human mapusili ni Bernardo Baquid, 52, tanod sa maong barangay.
Sa imbestigasyon sa kapolisan nasayran nga nakig-inom si Lumandas sa mga higala diha sa panimalay ni Danny Amarillo sa maong dapit.
Sumala pa nasuko ang suspek dihang naatol nga sa paglabay niini mibahakhak og pangatawa ang ilang grupo ug gisitar sila niini, apan inay maminaw sa eksplinasyon nasuko ang suspek ug diretsong gipusil si Lumandas sa dughan hinungdan sa pagkahagba nini.
Si Lumandas daling gidala sa tambalanan ug kasamtangan kining giobserbahan sa mga mananambal.
Si Baquid nasikop sa kapolisan ug gibalhug sa buhatan sa Lapulapu City Police Office samtang gihikay pa ang kaso niini. BANAT NEWS