Lalaki gipusil sa bana sa usa ka ginang tungod sa 'text'

CEBU, Philippines - Gipusil sa bana ang gidudahan niining karelasyon sa iyang asawa samtang ang biktima nag-inom sa usa ka tindahan uban sa iyang mga higala pasado alas-4 sa miaging hapon diha sa sitio Estaca sa barangay Tunghaan lungsod sa Minglanilla.

Si Romeo Dela Torre, 65, biyudo, nagpuyo sa sitio Sto. Niño sa barangay Inayagan sa dakbayan sa Naga nakaangkon og samad pinusilan sa likod ug nalandig sa South General Hospital.

Samtang ang suspetsado nga padayon pang gipangita giila sa kapulisan nga mao si Juanito Saraña, 55, residente sa sitio Estaca sa nahisgutang barangay.

Si PO2 Nikki Carlo Plarisan sa Minglanilla Police Station nga nahinabi sa Banat News nagkanayon nga nag-inom og tuba sa tindahan ang biktima ug mga higala dihang naabtan sa suspek nga nagsakay og biseklita ug sa kalit lang gipusil niini ang biktima.

Matud ni Plarisan nga sa ilang gihimong dugang pakisusi, ang bana giingong nakabasa sa text sa biktima diha sa cellphone sa iyang asawa nga nag-ingon: “magkita ta.” Wala hinuon nila maestablisar kun kanus-a mi-text ang biktima ngadto sa asawa sa suspetsaado.

"Naay knowledge ang suspek nga may relasyon iyang asawa sa biktima, nakabasa man nga magkita sila," asoy pang PO2 Plarisan. BANAT NEWS