TCPS ug langyaw mipaayo sa classroom

CEBU, Philippines - Ang Talisay City Central School sa dakbayan sa Talisay nakabenepisyo sa gipahigayong ‘adopt a room’ sa kapolisan sa siyudad niadtong Lunes.

Si Supt. Eddie Recamara, hepe sa Talisay City Police Station nga nahinabi sa Banat News mibutyag nga usa ka room sa grade one sa TCCS nga grabe na kaguba ang maoy ilang giayo. Matud niya nga ang kapolisan maoy mipanday niini ug sila usab ang migasto sa mga gikinahanglang materyales.

Apan nagpasalamat siya tungod kay dunay usa ka negosyanteng langyaw diha sa Talisay kinsa nagdumili sa pagpabutyag sa iyang pangalan ang mitabang usab.

Ang maong langyaw nakakita sa gibuhat sa kapolisan hinungdan nga miako kini og unom ka lawak-saringan nga iyahang ipaayo gamit ang kaugalingong salapi. Ugmang adlawa sugdang ayuhon ang maong mga lawak aron magamit kini pagbukas sa klase karong Lunes.

Gawas niini gibutyag usab sa hepe nga sa Miyerkules, Hunyo 6, 2012 gikatakdang magpahigayon usab sila og feeding program diha sa TCCS ug mohatag og mga pahimangno alang sa seguridad sa mga tinun-an ngadto sa mga ginikanan ug mga magtutudlo. BANAT NEWS