CEBU, Philippines - Na knockout ug namatay sa kumo ang usa ka giingong maestro human kini giingong gikulata sa usa ka batan-on human sa ilang panaglalis pasado alas-4 sa kaadlawon kagahapon diha sa sitio Dunggoan barangay Perrelos syudad sa Carcar.
Ang biktima nailhan nga si Danilo Enad, 49, magtutudlo sa usa ka tunghaan sa lungsod sa San Fernando samtang ang mi-knockout kaniya giilang si Jade Casas, 22, molupyo usab sa maong lugar.
Sa pakighinabi sa Banat News ni PO1 Junjie Lastimoso miingon nga nag-inom pa ang duha sa maong dapit apan nagkalalisay ug nasukmagan sa suspek ang biktima hinungdan sa pagkahapla niini.
Ang biktima daling gidala sa Carcar City District Hospital apan gideklarar kini nga dead on arrival. Nasuta nga mikaratel og dagan palayo ang suspek ug milarga padulong sa igsuon niini sa dakbayan sa Talisay.
Apan boluntaryo kining gitahan sa maguwang ngadto sa kapolisan kagahapon sa udto. Matud pang Lastimoso miangkon sa krimen sa pasiunang pagsukitsukit ang suspetsado.
Gisusi pa sa kapolisan kung kumo ba gyud ang nakapatay sa biktima pinaagi sa awtopsiya. (BANAT NEWS)