3 patay sa aksidente

CEBU, Philippines - Tulo ka tawo ang patay ug usa ang angol sa duha ka managlahing aksidente sa motorsiklo sa kadalanan sa isla sa Camotes ug Balamban niadtong Domingo.

Duha ang patay ug usa ang kritikal ang kahimtang dihang ang gisakyang motorsiklo nagsakay sa motorsiklo dihang nakabangga og laing motorsiklo niadtong Domingo sa alas-11 pasado sa buntag diha sa provincial road sa barangay Western Poblacion lungsod sa San Francisco isla sa Camotes.

Sigun sa taho sa kapulisan nga gipadangat diha sa Operation Branch sa Cebu Provincial Police Office (CPPO) ang nakalas mao si Lezeir Mistula,39, samtang grabe ang asawa niining si Perlita,40, pulos nagpuyo sa barangay Sta. Rita sa lungsod sa Poro.   

Samtang nakalas usab ang drayber sa ilang gikabanggang motorsiklo nga si Joseph Albaracin, 21. Ang magtiayon paingon sa munisipyo sa lungsod sa San Francisco subay sa provincial road dihang pag-abot sa nahitaboan gikabangga niini ang motor ni Albaracin.

Tungod kay parehong kusog ang dagan pulos nangalagpot ang mga sakay sa duha ka motor ug nakaangkon og grabeng kadaot sa ulo ug kalawasan. Ang mga residente sa dapit maoy midala kanila sa Maningo District Hospital apan gideklarar ni Dr. Gina Javier nga dead on arrival (DOA) sila si Lezeir Mistula ug Albaracin.

Sa laing aksidente, patay ang usa ka Roger Nuñez Salazar, 46, nga taga barangay Aliwanay, Balamban human kini madasmagi og motorsiklong ang drayber giingong hubog diha sa barangay Bundol sa lungsod sa Balamban niadtong Domingo sa alas 9:50 sa gabii.

Natanggong na karon ang drayber nga si Glecerio Caminos, 23, taga barangay Prenza Balamban kinsa matud pang PO1 Landy Divinagracia sa Balamban Police Station nga nahinabi sa Banat News paingon nang mouli ang biktima dihang nadasmagan sa suspek daplin sa dalan.

Ang suspek giingong hubog niadtong tungura base sa paghiling sa doctor nga mitambal sa mga pangos niini tungod sa aksidente. (BANAT NEWS)