Lalaki gi-salvage gisulod og sako

CEBU, Philippines - Usa ka gituohang biktima sa salvage ang napalgang patay nga naputos og samad pinusilan ang ulo ug kalawasan nga gibinaklid og gapos ang duha ka kamot niini nga gisulod og sako dayong gilabay sa pilapilan sa sitio Luwak barangay Canbanua sa lungsod sa Argao kagahapon sa alas 8:00 pasado sa buntag.

Ang biktima nga gihulagway lang sa kapulisan nga nagpangidaron og 20- anyos ngadto sa 25-anyos, gibanabanang 5’2 ang gitas-om, brown complexion.

Matud ni PO2 Marvin Cheng sa Argao Police Station dihang nahinabi sa Banat News usa ka Erlinda Lopez, 57, nagpuyo sa maong lugar ang nakadiskobre sa biktima.

Ang patak sa dugo diha sa dalan padulong sa umahan niini maoy nakaingon nga natultulan niya ang sako nga dunay sulod nga nagkadugo ug tungod sa pagduda iyaha kining gipahibalo sa mga opisyales sa barangay kinsa mitawag dayon og polis. Sa pagsusi sa maong sako nakit-an ang usa ka lalaking wala na kinabuhi sa sulod niini, nasuta nga duna kini daghang samad pinusilan sa ulo ug kalawasan nga gituohang maoy hinungdan sa hinanali niining kamatayon.

Gigapos kini nga gibinaklid ug giputos og habol sa wala pa isulod sa maong sako. Gituohan sa kapulisan nga taga laing lugar ang biktima ug diha lang gilabay sa maong lugar gibanabanang alas 2:00 ngadto sa alas 4:00 sa kaadlawon. (BANAT NEWS)