Mayo 29

CEBU, Philippines -  1919 – Ang “theory of relativity” sa pamosong Amerkanong physicist nga si Albert Einstein napamatud-ang tinuod ug dili mugna lang sa imahinasyon. Kini dihang nahitabo ang total solar eclipse niining petsaha sa maong tuig nga diin ang mga posisyon sa mga bitoon duol sa adlaw atol sa pagkahitabo daw nainat tungod sa gravity sa adlaw. Sumala pa sa mga teoriya bisan gani ang kahayag sa suga maapektahan sa gravity mao usab kini sa bisan unsang butang sa kalibutan.

1829 – Namatay ang Briton nga si Humphry Davy nga usa ka chemist ug imbentor. Si Davy mao ang nakadiskubre sa daghang klaseng sa alkali ug alkaline earth metals. Partikular sa iyang mga nadiskubrehan mao ang sodium, potassium, calcium, magnesium, barium, strontium ug boron. Usa siya sa miimbestigar sa mga kinaiya sa chlorine ug iodine. Usa sa gamit kaayong imbensyon ni Davy mao ang Davy lamp nga karon nag-unang gamit sa mga minero. Ang maong lampara migamit og pino nga panapton nga gamitan og heavy oil una pa dagkotan , ang maong suga dili makamugna og pag-ulbo sa tanang matang sa gas nga sagad naa sa ilawom sa mga minahan nga daling moulbo. Ang maong suga maka-detect usab kung dunay carbon dioxide sa palibot.

1848 – Nahingpit ang pag-angkon sa Estados Unidos sa mga teritoryo sa New Mexico, California, pipila ka bahin sa Nevada, Utah, Wyoming, ug Colorado human giratipikahan sa nasud sa Mexico ang kasabutan nila sa US apan gipabayran niini o daw gibaligya niini ang maong mga teritoryo sa kantidad nga $15 milyones dolyares. Una niini gipahigayon sa US ug Mexico ang Guadalupe Hidalgo Treaty diin nakompirmar ang pangangkon sa US nga iyaha ang Texas.  - BANAT NEWS