Dumabok mi-warning sa botante

CEBU, Philippines - Ang tigpamaba sa Akbayan-Cebu nga si Mikay Dumabok mipasidaan sa mga botante nga dili magpailad sa mga politiko nga nagsugod na og suroy-suroy sa kabarangayan pagkampanya alang sa umaabot nga election.

Matud pa niya nga mao kini ang bisyo sa mga politiko kun magsingabot ang piniliay apan kun anaa na sa puwesto tikig na kaayo og liog ug dili na molingi ilabi na kun dili nila kaila ang mga tawong moduol kanila. Gisaway sa maong grupo ang mga politiko nga nagsugod na og pangampanya ug alang kanila hilas kaayo nga paminawon ang maong mga politiko.

Miingon si Dumabok nga kun moduaw sila sa barangay kay may dala nga kaayohan, ang maong dala nila nga alang sa taga barangay maoy angay nga saludohan, apan ang politiko nga yabag dili angayang tagdon.

Dugang pa niya nga adunay ubang politiko nga kalimtan na ang barangay kung sila makalingkod na sa ilang posisyon ug motabang lang sa ilang konstituwente kung magkaduol na usab ang piniliay.

Busa mipasidaan ang Akbayan sa katawhan nga tarungon pagpili ang tawo nga mokandidato sa umaabot nga election ug isalikway kadtong mga politiko nga mopatim-aw lang kung duol na ang piniliay.

Matud pa ni Dumabok nga mihimo na sila karon og nagkadaiyang forum sa mga botante ilabi na kadtong mga batan-on nga makabotar na sa sunod tuig.

Miingon siya nga dili angay nga magpadani sa silaw sa kuwarta kundi ang kapasidad sa usa ka kandidato nga mosilbi sa tinarong ngadto sa katawhan maoy angayang tan-awon. (WC)(BANAT NEWS)