Tanod gipatay sa ig-agaw

CEBU, Philippines - Patay ang usa ka tanod human kini mapusili sa pagresponde sa nahitabong karambola atol sa gipahigayon kapistahan sa barangay Buagsong sa lungsod sa Cordova kagahapon sa kaadlawon.

Si Eduardo Tura, 49, giingong gipatay sa iyang ig-agaw nga si Ronilo Tura, 39, sa wala pa matinong hinungdan apan giingong aduna nay karaang panagbangi ang duha kaniadto.

Sa pakighinabi sa Banat News ni SPO1 Danny Alburo, Cordova Police Station, misaysay kini nga ang biktima nagbantay sa diskohan gibanabanang 200 metros gikan sa kapilya diin mahitabo ang karambola.

Sumala pa nga sa pag-abot sa biktima gibuwag niini ang nagsumbagay. Pipila ka minutos ang milabay giingong gikabangi na sa biktima ang suspek tungod sa kalambigitan sa igsuon sa naulahi sa maong kagubot.

Apan tungatunga sa lalis kalit nga nadungog ang lima ka buto sa armas ug nakita nalang nga nagbuy-od na ang biktima ug nagkadugo, apan wala na kini madala pa sa tambalanan human nabugtui sa gininhawa.

Ang suspek nadakpan dayon sa kapolisan apan walay nakuhang armas gikan kaniya. Nasuta sa gihimong awtopsiya sa medico legal sa Municipal Health Office nga si Dr. Christopher Calimbos ang resulta sa kamatayon sa biktima mao ang dinuggaban sa iyang kilid ug ang hiniwaan sa ulo niini.

Wala pa masayri sa kapolisan kun si kinsa ang tawong gidudahang may armas nga mipabuto atol sa kagubot. (BANAT NEWS)