CEBU, Philippines - Ang Technical Education Skills Development Authority (TESDA) sa Central Visayas naningkamot nga makakuha og certification gikan sa International Standard Organization (ISO).
Matud pa ni TESDA7 Assistant Regional Director Buenafe Sta. Rita nga nagkugi gayud sila pag-ayo aron matuman ang gipangayo sa Audit Qualifying Body aron sila makapasar sa ISO accreditation.
Dugang pa usab ni Sta. Rita nga ilang gibisita ang TESDA sa Samar aron masayud sa mga paagi pagkuha og ISO-certification.
Dugang pa usab ni Sta Rita usa niini mao ang pagtuon og tukmang benchmarking aron sa pagsiguro nga sila makapasar sa ipahigayong ebalwasyon karong umaabot nga Hulyo.
Ang benchmarking maoy sistema sa pagtuon sa mga pamaagi sa organisasyon, produkto,mga programa ug stratehiya.
Midugang si Sta. Rita nga miduaw sila sa TESDA sa Samar nga bag-ohay lang mipasar sa ISO nga gipahigayon sa nag-unang Multi-National Certification and Inspection Body nga nagbase sa Munich nga maoy mo-inspection, mohatag og sertipikasyon, ebalwasyon, ug tanang paagi sa pagsuway aron mopasar sa ISO ang usa ka ahensya sa gobiyerno.
Si Sta. Rita mibutyag nga kung makakuha na sila og sertipikasyon sa ISO kini ang kamatuoran nga dekalidad na ang ilang serbisyo.
Ang ISO 9001 usa ka inilang quality management standard nga nagtino pagtuman sa gikinahanglang Quality Management System (QMS) nga nagpunting sa abilidad sa organisasyon aron makab-ot ang mga gikinahanglan sa mga kostumer ingon man sa International Standards Organization (ISO), paghimo niini nga usa ka ahensya sa edukasyon. (BANAT NEWS)