Lola giluba sa laing lola angol

CEBU, Philippines - Gumikan sa bangi  sa mga apo, samaran ang usa ka lola human kini dunggaba sa iyang silingang lola usab didto sa Sitio Ihawan, barangay Mantuyong, dakbayan sa Mandaue sa miaging adlaw.

Ang biktima mao si Erwina Arnoco, 58, nga molupyo sa maong dapit samtang ang suspetsado mao si Patrocenia Baloro, 57, nga silingan sa biktima.

Sa imbestigasyon sa kapolisan nasuta nga naglinabanay ang suspetsado ug biktima sa ilang mga menor de edad nga mga apo kinsa nagkabangi gumikan sa personal nga hinungdan.

Gumikan kay bug-at ang pagdumot sa suspetsado batok sa biktima, wala kini kaantos dihang miagi ang biktima tungod sa ilang balay milanit kini sa iyang kutsilyo ug walay daghang langas giluba ang biktima.

Ang biktima nga samdan sa nagkalainlaing  dapit sa lawas dali nga gihatud dayon ngadto sa Vicente Sotto Memorial Medical Center sa dakbayan sa Sugbo

Hinuon si Baloro dali nga gisikop sa kapolisan ug gitanggong dayon sa prisohan sa dakbayan sa Mandaue samtang giandam na ang kasong ipasaka batok kaniya. - /WC (BANAT NEWS)