80-anyos napaig

CEBU, Philippines - Napaig ang usa ka 80-anyos nga byudo human kini maapil og kasunog sa naugdaw niyang payag sa bukirang bahin sa sitio Kankalape, barangay Compostela sa lungsod sa Alegria alas 8:00 ang takna sa Miyerkules sa gabii.

Ang biktima nga maayong pagkapaig mao si Bernabe Lopengco,80, byudo ug nag-inusarang nagpuyo sa maong payag.

Matud ni PO1 Melvin Patoc sa Alegria Police Station dihang nahinabi sa Banat News nagtuong natulog na ang biktima niadtong higayuna nga nagsuga lang kini og lamparilya tungod kay wala may kuryente ang balay niini. Gidudahang nasaghiran ni Lopengco ang lamparilya ug nayabo ang gas sa kawayan nga lantay nga nakaingon sa sunog. Tungod sa distansiya sa gilay-on sa payag sa biktima wala dayo’y nakatabang nga silingan niini ug sa ilang pag-abot naugdaw ang payag ug patay na ang biktima.

Ang mga polis nga miresponde duha ka oras pa naabot gikan sa pagsugod sa sunog tungod sa gilay-on sa dapit gikan sa sentro sa lungsod ug igo nalang nila gikuha ang patay’ng lawas ni Lopengco. BANAT NEWS