Pugante nakaipsot

CEBU, Philippines - Subling nakaipsot sa mga awtoridad ang pinirisong nakaeskapo sa dakbayan sa Mandaue tungod sa giingong kawalay koordinasyon sa kapolisan ug sa mga jail guards nga buot untang mosikop kaniya kagahapon sa kaadlawon.

Si Ricky Andujar nga may kasong robbery ug illegal possession of firearms nakaeskapo gikan sa iyang escort human sa iyang arraignment niadtong Martes ug nasakpang nagtago diha sa balay sa iyang iyaan sa barangay Bajac, lungsod sa Liloan.

Apan tungod kay walay koordinasyon ang BJMP ug mga sakop sa Mandaue City Police Office nga pulos nag-apas nga madakpan kini nakaipsot hinuon si Andujar pinaagi sa paglayat sa bintana.

Usa ka tinubdan kinsa nagdumili sa pagpahingan mibutyag nga ang mga sakop sa Bureau of Jail Management and Penology wala makahibawong sa wala pa sila maabot sa lugar duna nay napulo ka mga polis sa MCPO nga nag-posisyon duol sa balay sa iyaan sa pugante.

Apan kalit lang silang nakabati og warning shot ug mikaratel na og dagan palayo ang suspek, diha nalang nila mahibaw-ing dunay grupo sa BJMP nga naghupohupo usab sa lugar aron dakpon si Andujar.

Si Chief Inspector Gil Inopia, officer-in-charge (OIC) sa Mandaue City Jail sa gipahigayong press conference kagahapon nagkanayon nga ang iyang sakop mipabuto og warning shot tungod kay milayat gikan sa bintana si Andujar.

Miangkon si Inopia nga nakadawat sila og report nga diha magtago si Andujar apan di 100 porsiyentong sigurado sila sa impormasyon. Samtang ang MCPO gikuyogan nianang tungura sa silingan sa suspek sa Binaliw nga maoy nagtultol kanila sa gitagoan niini.

Sa laing bahin, tungod sa hitabo girelibohan ang jail warden sa MCJ nga si Supt. Jessie Calumpang ug ang escort ni Andujar nga si JO2 Rolando Salazar alang sa imbestigasyon. BANAT NEWS