CEBU, Philippines - Nabulit og pito ka samad tinigbasan ug dinunggaban ang kalawasan ug gigulgolan pa ang ubol-ubol sa usa ka bakasyonistang pintor diha sa sitio Can-anday barangay Maravilla sa lungsod sa Tabuelan niadtong Miyerkules sa alas 11:00 sa buntag.
Ang biktima mao si Dobello Soreno Calinawan, 42, taga sitio Lawis barangay Mambaling sa dakbayan sa Sugbo, samtang ang suspek mao si Conrado Mahusay, 48, molupyo sa maong lugar.
Subay sa imbestigasyon sa kapulisan pinangulohan sa hepe sa Tabuelan Police Insp. Emmanuel Masong ang biktima mikuyog sa iyang bayaw nga nibakasyon sa maong lugar aron mangaligo og dagat.
Matud pa ang suspek nga gidudahang may deperensya sa pangisip kalit nga misaka sa balay nga gisak-an sa biktima nga nagbitbit og sundang.
Pagkakita niini sa biktima kalit niining gitigbastigbas ug giduslak- duslak sa bukobuko, dughan ug tiyan, pagkahuman gigulgol sa suspek ang liog sa biktima.
Ang bayaw sa biktima ug ang asawa niini natarantar sa kakalit sa hitabo ug naglumba og panagan palayo sa balay.
Ang mga polis nga pinangulohan ni Insp. Masong daling mirespondi sa dapit ug nadakpan ang suspek nga mitahan ra usab sa iyang kaugalingon.
Atol sa pagsukitsukit sa kapulisan ngadto sa suspek giingong mitug-an kini nga nakadungog siyang gihulga siyang patyon sa biktima maong iyaha nalang kining giunhan. Nakadawat usab sila og report nga dunay nervous breakdown ang suspek. BANAT NEWS