DILG nangandam batok katalagman

CEBU, Philippines - Agi og pagpangandam sa mga katalagman nunot sa pag-usab-usab sa dagan sa panahon sa nasud ang Department of Interior and Local Government (DILG) mopahigayon og pagbansaybansay sa nagkadaiyang LGUs kabahin niini karong adlawa.

Ang Tapatan on Disaster Preparedness and Climate Change Adaptation: A Call to Action anha himuon sa Cebu International Convention Center (CICC) sa syudad sa Mandaue.

Tuyo sa DILG nga mopahigayon og mga panagtigom sa nagkadaiyang rehiyon aron hingusgan ang pagpangandam sa katalagman.

Matud pa ni Atty. Danilo Almendras, Chief Operations Division sa DILG nga gusto nilang mapatas-an ang kaalam sa publiko mahitungod sa peligro ug risgo ug mga hulga sa katalagman.

Giawhag usab sa DILG ang LGU sa pagmugna og kaugalingong Disaster Preparedness Action Plan taliwala sa pag-usab-usab sa kahimtang sa panahon.

Buot sa DILG nga tumanon sa LGUs ang RA 10121 o Philippine Disaster Risk Reduction and Management Act of 2010 ug usab RA 9729 o Climate Change Adaptation of 2009 isip giya aron kalikayan ang dakong kadaot. (BANAT NEWS)