Armas sa 11-anyos regalo daw sa amahan - biktima

CEBU, Philippines - Dili makapasaylo ang 13-anyos nga batang lalaki ngadto sa 11-anyos nga higala nga aksidenteng nakapusil kaniya niadtong Sabado sa hapon sulod sa billiard hall diha sa barangay Pasil.

Si Nicko,13, tinuod pangan gipugngan sa Banat News, nakaestorya na sa labing unang higayon sulod sa Male Surgical Ward sa Cebu City Medical Center (CCMC) kagahapon sa buntag.

Sa pakighinabi kaniya sa Banat News siya mitug-an nga dako kaayo ang sala nga nabuhat sa 11-anyos ngadto kaniya dihang sila uban sa tulo ka mga higala nagduwa sulod sa billiard hall.

Gibutyag niini nga iyaha pang gibadlong ang 11-anyos nga dili magduwa sa maong armas apan wala kini mopatuo ug gitangtang ang tanang bala dayon gibalik ang usa ug dayon gition ngadto kanila.

Matud pa kaduha gikablit ang maong armas ug wala mobuto apan sa ikatulong pagkablit nibuto kini nga nag-atubang kaniya.

“Giitsahan ko og piso kay gisugo ko’g palit sigarilyo, maayo gani kay nakaduko ko kay ug wala pa ari gyud ko maigo sa agtang,” asoy pa sa biktima. Matud niya nga buntag pang nagdaladala sa armas ang 11-anyos nga gipanghambog niining giregalo sa iyang amahan sa iyang birthday niadtong Abril.

Maayo nang makasulti ang bata apan ang walang bahin sa iyang lawas lahos na ngadto sa walang tiil dili makalihok apan masaligon ang mga doctor nga maulian ra kini.

Ang konseho sa Pasil pinaagi sa resolusyong gipalabang ni kagawad Carlito Sabalones nagkauyon nga mohatag og P10 mil nga cash assistance sa ginikanan sa biktima, samtang gipasaligan og financial assistance nga P25 mil ni Kongresista Tomas Osmeña ang bata ug laing P25 mil si Mayor Michael Rama alang sa mga nanginahanglan og medisina diha sa maong tambalanan.

Samtang si Sr. Supt. Melvin Ramon Buenafe, hepe sa Cebu City Police Office (CCPO) miingon nga ila nang nahibaw-an daan nga gipanag-iya ang armas sa amahan sa bata atol sa gihimong imbestigasyon sa iyang mga sakop. “Unfortunately naay liability ang father pwedeng accessories, physical injuries, aside from that dunay Warrant of Arrest (WOA), different case related to illegal drugs,” sumala pa ni Buenafe.

Matud niya nga bisan tuod og aksidente ang nahitabo apan manubag gihapon ang amahan sa 11-anyos. Hinuon iyang gitataw nga ang pamilya sa 13-anyos nga biktima mahimong mosang-at og kaso batok sa amahan sa 11-anyos nga bata. (/EIM)(BANAT NEWS)