Gitabanga'g luba angol sa igsuon

CEBU, Philippines - Naangol ang usa ka ulitawo human tabangi og dunggab ug bunal   sa iyang duha ka manghod didto sa barangay DAS , dakbayan sa Toledo niadtong Martes sa kaadlawon.

Si SPO1 Thule Tahanlangit, sa kapolisan sa dakbayan sa Toledo miila sa biktima nga si Reygie Goc-ong, 24, ulitawo, samtang ang miluba ug mibunal kaniya mao ang iyang mga manghod nga sila si Rodelon Goc-ong, 22 ug ang manghod niini nga bayong-bayong.

Sumala sa kapolisan nga nagkaaway ang biktima ug ang mga suspetsado ug gibunalan kini ni Rodelon og basiyo sa botelya samtang ang manghod niining 17 anyos maoy milanit og kutsilyo nga gigamit niini sa pagluba sa biktima.

Human mahagba sa yuta ang biktima nanglayas dayon ang mga suspetsado, samtang ang mga kabanay na niini mao mihatud sa biktima ngadto sa Toledo City Hospital.

Samtang usa ka suspetsadong pusher sa shabu nasikop uban sa usa ka gamay’ng putos sa gituohang shabu   nga nasakmit sa kapolisan gikan kaniya didto sa lungsod sa Barili sa miaging Lunes sa buntag.

Ang suspetsado nailhan nga si Junel delos Reyes Muntimayor, 26, nga taga Campangga sa maong lungsod.

Ang suspetsado nasikop pinaagi sa buy bust operation nga gilusad sa kapolisan sa maong lugar diin nasakmit usab sa mga otoridad ang P100 nga marked money gikan sa suspek. Natanggong na sa prisohan ang suspek samtang nagpaabot sa tukmang kaso nga isang-at batok kaniya. (BANAT NEWS)