CEBU, Philippines - Supak ang mga operator sa buwangan sa ordinansa nga nagtinguhang patas-an ang buhis alang sa mga buwangan dinhi sa siyudad sa Sugbo.
Kini maoy gipadayag sa pipila ka mga operator sa gipahigayong public hearing kagahapon.
Sumala pa ni Victoriano Chiongbian, operator sa usa ka buwangan sa Barangay Tejero nga ilang gibabagan ang pagpasar sa maong ordinansa gumikan kay sa pagka-karon, dyutay nalang sila og mga customer.
Samtang ang kapitan sa Barangay Agsungot nga si Pastor Alcover II kinsa usa usab sa misupak usab sa maong ordinansa miingon nga kung patas-an pag-ayo ang buhis sa buwangan may kalagmitang magtukmod kini sa pagdagsa sa illegal nga buwangan. Giklaro hinuon ni Alcover nga wala siya magpadagan og buwangan apan igo lang siya nga mipadayag sa iyang opinyon sanglit pipila sa mga tawo gihimo nalang kalingawan sa ilang kinabuhi ang buwangan. Gumikan niini padayong gitun-an sa konseho ang baruganan sa mga operator batok sa maong isyu. (BANAT NEWS)