Motabok sa Fernan Bridge gipasidan-an SA DPWH 7

CEBU, Philippines -  Mipasidaan ang Department of Public Works and Highways (DPWH) 7 sa mga motorista nga sugdan na ang pag-ayo sa Marcelo Fernan Bridge karong umaabot Hunyo 4 ning tuiga.

Tungod niini, gipaabot nga magdasok gyud ang mga sakyanan nga sanglit usa lang ka lane ang buksan samtang ayuhon ang pikas lane gikan sa Mandaue padulong sa Lapulapu.

Matud pa ni Engr. Renault Ricardo, Assistant District Engineer sa Cebu 6th District Engineering Office of the DPWH-7 atol sa Association of Government Information Officers (AGIO) forum kagahapon nga mangabot na ang mga materyales gikan sa Korea karong Mayo 27.

Gipaabot nga maghuot ang trapiko sulod sa unom ka semana sa maong taytayan sanglit moabot og duha ngadto sa tulo ka semana ang pag-ayo sa matag lane, target nga matapos ang proyekto karong Agosto 30.

Ang nag-unang ayuhon sa maong taytayan mao ang 16 ka expansion joints ug ang pagtangtang sa nahabiling guba nga rubber joints.

Gipahimangnoan sa DPWH-7 ang mga motorista nga batasanon ang pagtan-aw sa ‘work schedule’ sa pag-ayo sa taytayan aron makapangandam sa ilang pagbiyahe. BANAT NEWS