Kuwarta sa gobiyerno gibulsa sa politiko - Alcover

CEBU, Philippines - Si Kongresista Pastor Alcover Jr. mipadayag sa iyang kasagmuyo sa sistema sa panggobiyerno karon tungod kay ang kuwarta niini   anaa sa bulsa sa ubang mga politiko.

Atol sa 888 Forum sa Marco Polo Plaza Hotel kagahapon sa buntag si Alcover nagkanayon nga daghan ang nasuko kaniya tungod sa iyang gidusong balaodnon nga mao ang pagpatangtang sa pork barrel.

Imbes nga ihatag ngadto sa mga politiko ang pork barrel gusto niyang ihatag na lang unta kini direkta ngadto sa kabarangayan

Gipasabot ni Alcover nga ang pork barrel maoy usa sa hinungdan sa korupsiyon apan nasuko niini ang iyang mga kaubanan sa Kongreso ug gani gi-isolate siya karon.

Matud sa ANAD Partylist congressman nga nagtuo siya kaniadto nga ang gobiyerno bangkaruta ug wala’y kuwarta apan karon pa niya masuta nga puwerti diay’ng daghana og kuwarta sa panudlanan sa kagamhanan apan anaa kini sa bulsa sa ubang mga politiko.

Gumikan niini daghan kaayong barangay nga nagsakuong sa kakabus tungod kay wala kini suportahi sa mga politiko ug ang kapitan niini nga hapit wa nay purol namasahero nalang og habal-habal gumikan sa kagamay og honorarium.

Si Alcover nagkanayon nga ang nasud adunay 45,000 ka mga barangay   nga angayan untang palig-unon pag-ayo.

Matud pa niya nga kun ang pork barrel ideretso pa lang unta ngadto sa kabarangayan hayahay unta kaayo ang katawhan sa barangay kay direkta kining makapahimulos sa kauswagan sa ilang lugar ug busa makadaginot pa ang goberno.

Apan karon matud pa ni Alcover nga daghan kaayong politiko nga magtukod og tulay bisan way sapa unya ang sementadong karsada gub-on aron lang kunohay gastohan sa pork barrel sa usa ka politiko.

Gumikan niini nagpabilin ang nasud nga nagsakuong sa kakabus ug ang makaluluoy mao ang mga kabus, matud pa ni Alcover. BANAT NEWS