Kiha ni Pelaez pamolitika - Radaza

CEBU, Philippines - Gihulagway nga usa ka pamolitika ang gihimo sa negosyanteng si Efrain Pelaez sa iyang hulga nga ikiha ang mga opisyales sa dakbayan sa Lapulapu kalabot sa basura ug kahugaw sa palibot niini.

Sa usa ka press conference kagahapon si Mayor Paz Radaza mipadayag nga iya na karong nailhan si kinsa ang iyang makaatbang sa piniliay sa 2013. Matud pa sa mayor nga dili na bag-o ang gibuhat ni Pelaez nga magpamantala sa media kalabot sa pagpasaka niini og kaso batok sa mga opisyales sa siyudad sanglit gihimo usab niya kini niadtong nakalabay’ng 2010 elections dihang kini mikandidato.

Apan ning tungora iyang gikiha ang mga opisyales sa siyudad tungod sa giingong kawalay gihimo niini sa kampanya sa paghipos sa basura bisan sa P350 milyones nga gahin alang sa “Clean and Green” program sa siyudad sukad pa 2007. Kining tanan gipanghimakak ni Radaza tungod kay adunay Solid Waste Management Board ang dakbayan nga maoy nag-implementar sa "Solid Waste Management.”

Si Cleofe Solis ang pangulo sa maong board miingon nga pipila ka mga barangay kapitan ang mipagawas og kwarta sa ilang kaugalingong bulsa gumikan sa maong kampanya.

Pipila ka kaalyadong mga kapitan sa mga Radaza ang wala pasayloa ug gikiha sa board tungod sa kahugaw sa ilang barangay.

Samtang gipahibalo ni Radaza nga ang Lapulapu lang sa tibuok nasud maoy dunay kaugalingong modernong Material Recovery Facility nga karon nag-unang destinasyon sa nagkadaiyang local government units nga mag-educational tour aron makat-on sa nahimo sa Lapulapu sa tukmang paghipos sa basura. BANAT NEWS