Brigada Eskwela gisugdan

CEBU, Philippines - Nahimong mabulokon ang pagpangandam sa umaabot nga pag-abli sa klase sa gilusad nga Brigada Eskwela nga pormal gibuksan kagahapon Mayo 21, 2012 nga molungtad ngadto sa Mayo 25 ning tuiga.

Sumala pa ni Danilo Gudelosao, Education Program Supervisor sa Department of Education (Dep-Ed) 7 nga nahinabi sa Banat News pinaagi sa telepono nga gipokus niining maong programa ang pag-ayo sa mga nagkagidlay o guba nga mga pasilidad.

Sa maong adlaw gipaabot nga makit-an na dayon ang mga gikinahanglang ayuhon sama sa kasilyas, bintana, lingkuranan, blackboards, atop ug uban pa.

Usa ka motorkada ang gihimo sa DepEd kagahapon nga gisugdan diha sa Mabolo Elementary School nga gitambungan sa mga magtutudlo, ginikanan ug mga tinun-an.

Giklaro hinuon ni Gudelosao nga dili pinugsanay ang pagsalmot sa mga ginikanan sa Brigada Eskwela apan kini gituyo alang usab sa kaayohan sa mga bata aron makasugod dayon sila sa ilang klase.

Nahimo nang tinuig nga kalihokan ang Brigada Eskwela nga gisalmotan na dili lang sa mga ginikanan kay hasta ang mga caused-oriented groups misalmot na niini.

Gikatakda nga karong umaabot Hunyo 13 ning tuiga pormal nga pagabuksan ang klase sa tanang pampublikong tunghaan dinhi sa Central Visayas. - BANAT NEWS