TESDA kaabag sa K+12

CEBU, Philippines - Kaabag ang Technical Education Skills and Development Administration (TESDA) sa gipatuman sa kagamhanan nga K+12 education system sa nasud.

Si Nila Fidellaga, information officer sa TESDA 7 mibutyag kagahapon nga kutob sa mga estudyante nga moundang sa pagtungha gumikan sa kataas na sa katuigang ilang latason una mograduwar og kurso sa kolehiyo, ang TESDA maoy mosawo niini.

Matud pa niya nga kun mograduwar sa high school ang usa ka estudyante unya moundang na sa pagtungha kay walay ikagasto sa kolehiyo mahimo kaayong mokuha og minugbong kurso sa TESDA aron makatrabaho dayon.

Gani matud pa niya nga sa pagkakaron nagkadaghan ang serbisyo nga gitanyag sa TESDA nga gitumong alang sa mga kabus nga mga molupyo aron makakita dayon og kaugalingong panginabuhi. Gawas sa mga skills training , ang TESDA mohatag usab og akreditasyon sa mga eskuylahan nga gustong motudlo og vocational ug technical nga kurso sa ilang estudyante.

Midugang si Fidellaga nga ang TESDA mohatag usab    og assessment and certification ngadto sa mga mograduwar sa hain mang skills training sa maong ahensya aron makatrabaho sa gawas sa nasud.

May programa usab sila nga gitawag nga Tesda Specialista Technopreneurship Program (TSTP) diin mopahigayon sila og training sa mga skilled worker sa usa ka lugar aron magamit nila ang ilang hiantigohan sa kaugalingon nilang panginabuhi nga sila ang amo. Sa pagkakaron miingon si Fedillaga nga ang labing bag-o nilang serbisyo nga ihatag sa matag komunidad mao ang Training for Work Scholarship Program (TWSP).

Sa maong programa, ihatag sa TESDA ang libre nga traning niadtong mga scholar nga irekomendar sa matag tulunghaan alang sa mga kurso nga may labot sa call center, tourism, agriculture, construction ug uban pa. (BANAT NEWS)