CEBU, Philippines - Naglaraw ang tulo ka konsehal nga oposisyon sa dakbayan sa Talisay nga ipa-imbestigar sa konseho ang administrator sa Talisay City College (TCC) nganong wala dawata niini ang unom ka mga tinun-an nga nagpa-enroll sa miaging semana tungod lang sa kasong vandalism.
Usa kanila mao si Val Ylanan kinsa nagkanayon nga gusto usab nilang ilakip ang mga ginikanan sa maong mga bata sa pagpatawag aron mabati ang ilang habig.
Gipasabot ni Ylanan nga ang mga menor de edad nga estudyante wala dawata tungod sa kasal-anan nga ilang nahimo.
Si Konsehal Romeo Villarante ug Danny Caballero nga kaalyado ni Ylanan nagkanayon nga angay silang manginlabot niini tungod kay ang maong mga estudyante una pang higayon nga nakalapas sa balaod sa tulunghaan.
Base sa balaod sa TCC ang estudyante nga makalapas niini pahamtangan og silot nga 30 diyas sa pagkasuspenso sa unang paglapas, samtang sa ikaduha, dili na kini dawaton sa maong tulunghaan.
Tungod kay unang higayon pa sila nga nakalapas, alang sa maong mga estudyante ug sa ilang mga ginikananan dili pa sila angayang hikawan nga makapa-enroll sa maong tulunghaan.
Gikataho nga ang mga ginikanan sa maong mga tinun-an nawad-an sa paglaom nga makatiwas pa sa pagtuon ang ilang mga anak kay dili na sila makaabot sa paggasto niini sa mga eskuylahanan nga pribado tungod sa kalisod sa ilang panginabuhi.
Giklaro ni Villarante nga ang maong isyu buot nilang maresolba sa administrasyon sa TCC apan kung mohangyo kanila og panabang ang mga ginikanan sa unom ka mga estudyante andam silang motabang niini.
Matud usab niya nga ang komitiba sa edukasyon sa konseho pweding manggilabot sa maong problema.
Gipaabot sa nahisgutang mga konsehal nga kung ang maong mga tinun-an aduna may kalapasan sa school policy sa TCC kinahanglan nga ipaubos sila sa due process of law dili kay palagputon dayon sila. (WC)(BANAT NEWS)