13-anyos gipusil sa 11 -anyos

CEBU, Philippines - Kritikal ang kahimtang sa usa ka 13-anyos nga batang lalaki human kini pusila sa ulo sa 11-anyos usab nga batang lalaki nga ilang silingan didto sa barangay Suba, dakbayan sa Sugbo niadtong Biyernes sa hapon.

Si PO1 Esmer Escultor sa homicide section sa Cebu City Police Office (CCPO) nagkanayon nga didto kini mahitabo sa computer area sa Jumao-as Billiard Hall sa Santo Niño, sa eskina sa dalan Flores sa sitio Lawis, Suba.

Sa imbestigasyon sa kapolisan nasayran nga ang suspetsadong 11-anyos kansang mga ngalan gipugngan sa Banat News nagduwa og pusil kansang sumbohan gipaatubang ngadto sa biktima ug dihang gikablit ang gatilyo niini, pisok ang ulo sa biktima kansang ngalan gipugngan usab.

Si Cesar Abergas, 64, caretaker sa billiard hall, mibutyag sa mga polis nga samtang nagbantay siya sa mga nagduwa og billiard nakadungog siya og buto sa armas de fuego.

Dihang iyang gisusi maoy iyang nakita ang suspetsadong   bata   nga nagkupot gihapon sa pusil unya mikaratil og dagan ug misulti nga “ako na man to nakuha ang bala”.

Dihang gisusi niya ang gigikanan sa buto maoy iyang nakita ang biktima nga nagbuy-od sa sawog nga nagsugwak ang dugo niini gikan sa samad sa ulo.

Si Abergas daling mitawag og traysikad ug gidala ang biktima ngadto sa Cebu City Medical Center (CCMC).

Sukad kagahapon, si Escultor nagkanayon nga ang biktima gipaubos sa surgical operation ug anaa sa kritikal nga kondisyon.

Ang iyaan sa biktima nagkanayon nga paingon siyang mopauli sa ilang balay dihang nakit-an niya ang suspetsado uban sa amahan niini nga daling mibiya sa lugar nga nahitaboan.

Matud usab ni Escultor nga ang suspetsado ug ang amahan niini wala na sa pag-abot nila sa lugar.

Ang inahan sa suspetsado gipaubos karon sa kostudiya sa San Nicolas Police Station.

Gitambagan kini sa mga polis nga ipasurender nga boluntaryo ang iyang anak apan mibutyag kini nga wala siya’y kasayoran sa nahimutangan sa iyang anak sa pagkakaron.

Base sa napunitan sa mga polis nga tingga sa bala nga nalumping gikan sa lugar nga nahitaboan nasuta nga ang gigamit sa pagpusil kalibre .38 nga revolver.

Ang batang suspetsado ug ang amahan niini padayong gipangita sa kapolisan karon. (WC)(BANAT NEWS)