Kontrata sa Jadewell giputol na

CEBU, Philippines - Hingpit na nga gihunong sa tagdumala sa Jadewell Parking System ang ilang operasyon apan dili tungod kay ilang gidawat ang pagputol sa kagamhanan   sa ilang kontrata kundili tungod ug alang sa kaseguroan sa ilang mga kawani nga masugamak sa karambola kun ilang ipamugos ang pagpadayon sa ilang operasyon.

Si Manlalaban Giovanni Tianero nga maoy city legal officer sa Mandaue sa iyang pamahayag mipasabot nga niadtong Mayo 5 niining tuiga hingpit na nilang giputol ang kontrata sa maong towing company. Busa giawhag niya ang mga tag-iya og sakyanan nga kun goyuron sila sa towing truck sa Jadewell kinahanglang isumbong dayon nila kini sa kapolisan ug pasakaan og kaso nga carnapping.

Matud pa ni Tianero nga gipahibalo na usab nila ang kapolisan labot sa maong isyu aron sa pagtubag gilayon kun aduna sila’y madawat nga reklamo nga may labot sa Jadewell.

Si Tomas Villanueva nga maoy operation manager sa maong towing company dihang nahinabi sa Banat News nagkanayon nga nakahukom   nalang siya sa pagpahunong sa ilang operasyon dihang ilang namatikdan nga adunay mga tawo nga nagpapilit og mga pahibalo sa daplin sa mga dalan nga ilegal ang ilang operasyon.

Matud pa ni Villanueva nga wala sila mobati og kabalaka nga pasakaan og kaso sa tag-iya sa truck nga ilang maguyod karong giputol na sa kagamhanan sa dakbayan ang ilang kontrata.

Apan matud pa ni Villanueva nga dako sila og tinguha nga mohangyo kang Mayor Jonas Cortes nga ipadayon ang ilang operasyon aron dili mawagtangan og trabaho ang ilang mga kawani.

Matud pa ni Villanueva nga ang top management sa Jadewell Parking System andam nga makigsabotsabot ngadto sa kagamhanan sa dakbayan.

Si Villanueva miingon nga naluoy kaayo siya sa 30 niya ka mga kawani kinsa pulos na pamilyado apan wala nay trabaho ug musamot ang kabug-at sa mga problema niini karong tingbukas na sa klase sa tulunghaan.

(BANAT NEWS)