CEBU, Philippines - Daghan na kaayo ning matanga sa tanom nga herbs ug shrubs nga ihalas nanurok o nanubo diha sa atong kalibonan o kabugangan. Kun atong tan-awon kaamgid kini siya sa oregano o kalabo apan may pagka-oblong lang ang porma sa iyang dahon. Ang stevia nagagikan kini nga kabanay sa sunflower.
Ang herbal nga stevia, adunay 240 ka klase, nga lumad kining tanom sa subtropical ug tropical nga mga rehiyon, gikan sa western North Amerika, ngadto na sa South America. Liboan na ka mga tuig didtong dapita, gigamit nila kining kabahin na sa kahimsong sa ilang panglawas.
Ang usa ka klase o matang niani nga ginganlag Stevia Rebaudiana, nga sagad o komon nga gitawag nato’g sweetleaf, sweet leaf, sugarleaf o simple nga stevia, nga kini gipananum nga may hilabihan katam-is ang iyang dahon.
Isip nga natural sweetener ug hulip sa asukar, ang katam-is sa Stevia, inanay ug dugay mawala ang pagtagamtam mo niini, ikumpara sa mga naandang asukar. Hinoon usahay dunay mapaitpait tagamtamon human mawa ang katam-is gumikan sa kadaghan o kaespiso na sa paggamit.
Tungod sa gi-extracts nga steviol glycoside, nakapahimo kini sa Stevia nga moabot ngadto sa 300x o tulo kapid-an nga mas labaw o kinatam-isan kay sa ordinaryong asukar nga anaa sa atong kamerkadohan. Busa nahigmata ang atong mga eksperto, nga nakaangkon kinig dakung panginahanglan, labi na niadtong nagdiyeta sa carbohydrates. (BANAT NEWS)