Alegado vs. Gungob sa Consolacion

CEBU, Philippines - Kinahanglang mosurvey una   sa north district sa dakbayan sa Sugbo ang Team Rama aron makuha ang pulso sa katawhan kun kombinsido ba silang mag-kongresista si Annabelle Rama, ang ig-agaw ni Mayor Michael Rama.

Kini maoy gibutyag ni Annabelle kinsa mipadayag nga andam siya sa pagtuman niini ug himoon niya ang lapad nga konsultasyon.

Kahinumdoman nga nagparehistro na siya sa miaging adlaw dinhi sa siyudad sa Sugbo busa daghan ang nagtuo nga mao na kini ang usa sa lig-ong manok   sa Team Rama nga isabong batok sa   kasamtangang kongresista nga si Cutie del Mar.

Si Annabelle nagkanayon nga bisan wala siya’y kaagi sa politika, apan andam siyang magtuon sa mga gimbuhaton sa usa ka legislator aron makahatag siya og   maayong serbisyo ngadto sa katawhan.

Samtang gipadayag ni Mayor Rama nga usa ka maayong material si Annabelle sa north district ug giingon niya nga dako ang iyang pagsalig sa abilidad sa iyang ig-agaw sanglit aktibo usab kini sa mga kalihukan sa komunidad niadtong batan-on pa kini.

Gitataw sa mayor nga sa dihang wala pa mogawas ang maong isyu, iyang giingnan si Annabelle nga modagan pagka-senador apan ganahan gyud ang iyang ig-agaw nga dinhi sa Sugbo moserbisyo, butang nga iyang gihangop.

Ang kampo sa mga del Mar sa sayo pa mipadayag nga wala sila mahulga sa plano nga pagpakig-atbang ni Annabelle kanila.

Matud pa sa mga del Mar nga andam ang ilang grupo sa bisan kinsay makigsangka kanila gipangandaman nila kini pag-ayo   sanglit nasayod na nga daan ang mga tawo kung unsa nga mga proyekto ang ilang nabuhat. (BANAT NEWS)