CEBU, Philippines - Ang kapolisan sa dakbayan sa Talisay naglaraw sa paglusad sa kampanya nga Balik Eskuwela sa sunod buwan.
Si Superintendent Eddie Recamara, hepe sa Talisay City Police Station mibutyag sa Banat News nga sa kataposang semana sa Mayo mupahigayon sila og information drive sa tanang tunghaan sa siyudad.
Ang maong information drive kabahin sa mga safety tip sa kabataan aron mahilayo sila sa disgrasya.
Matud sa hepe sa kapolisan sa Talisay nga sa adlaw sa pagbukas sa klase may mga polis nga idestino sa matag tunghaan ilabi na kadtong anaa daplin sa karsada.
Sa milabay’ng tuig ang kapolisan nagpahigayon og “adopt a classroom” diin kutob sa mga eskuylahan nga gubaon, silang mga polis mitabang sa pag-ayo niini.
Si Recamara nagkanayon nga niining tuiga mosagop gihapon sila niining adopt a classroom ug ang budget maggikan sa kapolisan.
Sa laing bahin miingon si Recamara nga sa pagbukas sa klase edukahon nila ang mga estudyante bahin sa sistemang sagupon sa mga grupong mang-recruit og mahimo nilang sakop sa ilang grupo sa fraternity.
Gawas niini, giawhag usab niya ang mga ginikanan sa kabataan ilabi na kadtong mga gagmay pa nga kuyogan nila kini ngadto sa eskuwelahan aron mabantayan kini ilabi na sa pagtabok-tabok sa karsada ug sa pagsulod sa klase.
Giawhag usab niya ang mga ginikanan nga monitoron kanunay ang ilang mga anak aron makauli kini diretso sa ilang balay human sa klase ug dili magkuyog-kuyog sa barkada. (BANAT NEWS)