Lolypop nanghatag og school supplies

CEBU, Philippines - Nagsugod sa pagpang-apud-apod og mga school bag ug nagkadaiyang school supplies si Provincial Board Member Thadeo Ouano ug ang iyang anak nga si Emmarie “Lolypop” Ouano-Dizon didto sa syudad sa Mandaue niadtong Biyernes.

Si Ouano-Dizon nagkanayon nga ang pagpang-apud-apod sa maong mga school bag ug mga school supplies molanat pa og usa ka semana hangtud nga   kini mahuman sa Mayo 24.

Dugang pa niya nga gawas sa Mandaue, lakip nilang panghatagan ang mga kabataan didto sa mga lungsod sa Consolacion ug Cordova.

Si Board Member Ouano nagkanayon nga andam siya kanunay sa pagsuporta sa mga programa sa edukasyon sa gobiyerno.

Ang pagpanghatag og mga school bag ug mga supplies   sa eskuylahan kanunay na nga gihimo ni board member Ouano.

Mibutyag si Ouano-Dizon nga siya ug ang iyang amahan mopadayon usab sa ilang feeding program sa nagkadaiyang barangay sa Mandaue, Consolacion ug Cordova. (BANAT NEWS)