CEBU, Philippines - Kritikal ang kahimtang sa 43 anyos nga lalaki human kini tigbasa og pinuti sa amahan kinsa milaban sa iyang anak nga gika-away sa biktima didto sa barangay Maghanoy sa lungsod sa Barili niadtong Biyernes sa alas 9:45 sa gabii.
Ang biktima mao si Gorgonio Marata Walog, 43, ulitawo nga may kapuyo ug molupyo sa maong lugar, samtang ang suspek mao si Renato Recarte Alcover, 71, minyo, ug lumad nga taga barangay Cogon, siyudad sa Carcar. Si PO1 Richard Cababat desk officer sa Barili Police Station mibutyag sa Banat News nga ang biktima ug si Charlie Alcover, hingkod, nga anak sa suspek nagduwa og billiard sa sulod sa balay sa suspek.
Apan matud pa nagkalalis bahin sa ilang pusta ang duha nga misampot sa ilang panag-away.
Ang suspek nga naminaw sa away sa duha gibati og kabalaka kay gilupig sa lalis ang iyang anak hinungdan nga gilanit niya ang iyang pinuti ug sa paggawas niya sa ilang balay way pupangutana gihapsan diretso niini tulo ka higayon ang buko-buko sa biktima.
Nahiwa-hiwa sa mga samad ang likod sa biktima ug nasalbar kini kay nakadagan pa sa unahan ug natabang sa mga silingan kinsa maoy mihatud dayon kaniya ngadto sa Barili District Hospital.
Samtang ang suspek mitahan usab dayon ngadto sa kapolisan nga miresponde sa maong alarma ug nagkagulkol na karon sa prisohan samtang nagpaabot sa tukmang sumbong nga isang-at batok kaniya. (BANAT NEWS)