Linis Estero gilusad sa DENR

CEBU, Philippines - Gilusad sa Department of Environment and Natural Resources (DENR) 7 ang programa nga Linis Estero aron maatiman pag-ayo ang paglimpyo sa mga kasapaan   sa mga industriya nga anaa sa palibot niini.

Ning maong programa ang DENR-7 Maritrans Recycler Inc. and Taiheyo Cement Phl. Inc. mipirma og Memorandum of Agreement (MOA) niadtong Mayo 2 ning tuiga sa pagpatuman sa Adopt-a-River o Estero.

Si Regional Director Maximo Dichoso sa DENR-7 mibutyag nga ang maong programa gitambayayongan sa mga pribadong sektor aron mamintenar ang kahinlo sa mga kasapaan ug mga kanal sa palibot sa mga syudad, kalungsoran ug kabarangayan.

Dugang pa niya nga sa maong programa maminusan ang mga sakit sama sa cholera, dengue ug uban pa nga kasagaran mugna sa hugaw nga tubig sa kasapaan ug mga kanal.

Makapadasig usab kini sa katawhan sama sa mga nanimuyo sa daplin   sa Butuanon river ug sa Guadalupe kinsa maoy unang apektahan sa mga balatian nga mugna sa hugaw nga tubig sa ilang sapa.

Si Dichoso nagkanayon nga sumala sa nasayran niyang hinungdan sa mga lunop sa ubang mga siyudad   mao ang pagbara sa tubig gumikan sa hugaw sa basura   nga magtipun-og sa sapa sa ilang palibot. 

Matud pa ni Dichoso nga ang mga industriya nga mosagop sa sapa o moboluntaryo sa paghinlo sa sapa ug kanal sa ilang palibot maoy mopahigayon og   mga heavy equipment alang sa ilang mga tawo nga manghinlo sa mga linabay nga basura sa ilang palibot.

Niadtong 2011, 11 ka industriya ang mipirma og kasabotan tali sa DENR ubos sa programa nga Adopt-A-River nga gilangkuban sa Cenapro Chemical Corporation, Green Coil Industries Inc., Maritrans Recycler Inc., JLR Construction and Aggregates Inc., Lami Food Products Corporation, Profood International Inc., Treasure Island Industrial Corporation, Primary Homes Inc., Concrete Solutions Inc., Sunpride Foods Inc., Maritrans Recycler Inc., ug Cebu Holdings Inc.

Sa tuig 2012 si Dichoso nagplano nga himoong   18 ka industriya, mga magpapatigayon ug mga Local Government Unit. (WC) (BANATNEWS)